“ჩვენი ეზო”

ახალი მედიის ფორუმზე ვიღაც ჟურნალისტმა, რომლის სახელიც სამწუხაროდ არ მახსოვს, რაღაც გადაცემისთვის, რომელიც ასევე დამავიწყდა მაშინ – ჩამწერა. რამდენიმე კითხვა დამისვეს ბლოგზე, ორი მახსოვს კარგად/ ერთი დაახლოებით ასე ჟღერდა: – “მშობლები არ გეჩხუბებიან, ინტერნეტში რომ ხარ სულ”, მეორე კითხვით კი მივხვდი, რომ ის ჟურნალისტი აზრზე არ იყო, რას ნიშნავდა ბლოგი. მე რაღაც ისტორიები მოვყევი, შევეცადე, ცოტა უფრო თემატური ვყოფილიყავი, მაგრამ ჟურნალისტი “მანდ რომ ჩეთაობთ”-ს ვერ გასცდა. იმ დღეს კიდევ ერთი მომენტი მახსოვს, ჩემს სახელს და გვარს რომ იწერდა, ვუთხარი, ფსევდონიმი სჯობს-მეთქი, იმიტომ, რომ ჯერ არც ერთ სიუჟეტში მგონი ჩემი სახელი და გვარი სწორად არ დაუწერიათ. და აჰ, რას ამბობ, რა პრობლემაა – დოდი ხარხელი – რატომ უნდა დავუშვათ შეცდომაო.

სადღაც ერთი თვის მერე დაგვიძახეს სტუდიაში ჩაწერაზე. იქ გავიგე, რომ გადაცემას “ჩვენი ეზო” ერქვა. წამყვანის კითხვებზე იქაც ვიხალისეთ და მერე ისევ დამავიწყდა ამ გადაცემის შესახებ. კიდევ ერთი თვის შემდეგ “ჩვენი ეზო” ეთერში გავიდა.

გადაცემას ხარისხი ქუდზევე შეეტყო – მუვიმეიქერში ჩემნაირი ნუბიც რომ გააკეთებს, რაღაც იმ დონისაა.

ასეთუ ქუდი რომ გახურავს, თავში მაინც უნდა გეყაროს რაიმე ღირებული, რამენაირად რომ დაბალანსდეს…

პირველი სტუმარი – ოლეგ პანფილოვი, რომელიც რუსულად საუბრობს. რუსული ენა ძალიან მიყვარს, პანფილოვისადმიც სიმპათიით ვარ განწყობილი, მაგრამ პირველ არხზე გადაცემაში რუსული, როგორც ნებისმნიერი სხვა ენა – უ ნ დ ა   ი თ ა რ გ მ ნ ე ბ ო დ ე ს ! რაც, რა თქმა უნდა, ასე არ მოხდა.

გადაცემის თემა არის ინტერნეტ-ტექნოლოგიები… წამყვანს ეს გადაცემის მე-9 წუთზე ახსენდება. კიდევ იქით სადღაც კადრში ჩანს კომპიუტერის ეკრანი, სადაც ალბათ უნდოდათ ეჩვენებინათ “ონლაინ კომუნიკაციები” – ჯამში ვიღაც ვორდში კრეფს: “ახალი სამსახური ვიშოვეეე”.

და მთლად გენიალური – “ოდნოებში ახალი სურათი დავდე და შემიფასეეეეეთ”. რატომ, რატომ ბომბი არ ჩამოვარდა, ამას როცა ბეჭდავდნენ, მერე ახმოვანებდნენ, ამონტაჟებდნენ და ეთერში უშვებდნენ?

არც პროგნოზში შევცდი – ჩემი სახელი და გვარი არ წერია სწორად.

Adobe Premiere მაქვს ახალი გადმოწერილი და ვსწავლობ, ანუ ყველა ვიდეოს ვჭრი და ვაქუცმაცებ, რაც ხელში მხვდება. იგივე ბედი ეწია ამ გადაცემის ჩანაწერსაც – ამოვჭერი ერთი როკო, მე, რამდენჯერაც ვარ (აქედან თავიდან ბომჟივით რომ გამოვიყურები – ეგ ახალი მედიის ფორუმზეა ჩაწერილი) და ყვავა, რომელიც ნი2-ზე საუბრობს.

დანარჩენი მაინც ნაგავი იყო და მაინც, ასე რომ მთლიანად 1-საათიანი გადაცემისთვის არ გაგწირავთ.